'आई लभ यु भन्दा जिक्याएजस्तो लाग्छ'

उदयपुरमा जन्मे पनि काठमाडौंमा हुर्केकी हुन् पार्वती राई। आमाबुवाले दुःखसुख गरेर उनलाई महँगो बोर्डिङ स्कुलमा पढाए। कसैले उनलाई भविष्यमा 'के बन्छौ?' भनेर सोधे भने अभिभावकको चाहनाअनुसार 'डाक्टर' भनेर उत्तर दिन्थिन् तर उनी मनमनै सोच्थिन्, 'भन्नेमात्रै डक्टर, बन्ने त डान्सर नै हो।'

 

पार्वती आफ्नो मनको चाहना कहिलेकाहीँ अभिभावकसमक्ष पोख्थिन्। नृत्यप्रति छोरीको रुचि देखेर आमाबुवाले पनि उनलाई रोक्ने प्रयास गरेनन्। 'नाचेर खाने मान्छेले राम्रो कमाइ गर्न सक्दैन, त्यसैले पढ्नुपर्छ' भनेर अभिभावकले सम्झाउने प्रयास गरे तर आफ्नो रुचिको क्षेत्रमा निरन्तर लागिपरेकी पार्वती यस क्षेत्रमा अहिले सफलताको पर्याय बन्न सफल भएकी छन्।

२०६७ सालमा 'हेर्छौ ओठ टोकी' बोलको लोकदोहोरी गीतको भिडियोमा पहिलोपटक मोडलिङ गरेकी उनी 'रातो पछ्यौरी', 'एबीसीडी पढ्दिनँ', 'हुनेवाला जीवनसाथी', 'तरुनी मैले कसो गरुनी', ‘छलछल पानी छल्कियो', 'हङकङको साडीले', 'कार किनेर ल्याऊ'लगायत तीन सय ५० को हाराहारीमा म्युजिक भिडियोमा मोडलिङ गरेको बताउँछिन्।

विवाहपछि खासगरी केटीहरूको आत्मबल नै घटेर आउँछजस्तो लाग्छ। कतिपय साथी ओथारो बसेको पोथीजस्तो भएर घरमा बसेको देख्दा विवाह नै नगरौंजस्तो लाग्छ।

'व्यावसायिक रूपमा यो क्षेत्रमा लागेको पाँच वर्ष भयो। यसबीचमा काठमाडौंमा घर किनेँ। जीवन राम्ररी चलेको छ', पार्वती भन्छिन्, 'केटी मान्छेले नाचेर यति गर्नु चानचुने कुरा होइन। कतिले कसरी यति धेरै कमायौ, 'दानबहादुर' छन् कि क्या हो भन्छन्। मलाई रिस उठ्छ । दिनरात मेहनत गरेर काम गर्नेलाई पो थाहा हुन्छ, कसरी कमाइन्छ भनेर।'

चलचित्र 'हमजायगा' र 'मेरो जीवनसाथी'मा अभिनयसमेत गरेकी पार्वती स्टेज प्रस्तुतिका लागि अमेरिका, अस्ट्रेलिया, कोरिया, हङकङ, कतार, दुबई, बहराइनलगायत विभिन्न मुलुक पुगिसकेकी छन्। स्टेज प्रस्तुति र भिडियो मोडलिङ दुवै क्षेत्रलाई सँगै लिएर जाने लक्ष्य लिएकी नृत्यांगना एवं मोडेल पार्वती राई पैसा लगानी गरेर मोडेल एवं हिरो बन्नेहरूले उद्योगलाई धराशयी बनाउने बताउँछिन्।

 

चेतनाले काम गर्न थालेपछि नृत्यबाहेक अन्य कुरामा ध्यान नदिएकी उनी आफूलाई 'भुइँफुट्टा डान्सर' मान्छिन्। 'आफूले चाहेको क्षेत्रमा स्थापित भएकाले खुसी छु तर कहिलेकाहीँ सही बाटोमा हिँड्दाहिँड्दै कतिपयले अनावश्यक लाञ्छना लगाउँदा नरमाइलो लाग्छ', पार्वती भन्छिन्, 'केटी मान्छे समाजमा टिकेर हिँड्नुपर्छ।

विवाह गरेर अरूको घरमा जानुपर्छ। त्यति कुरा पनि मनन गर्दैनन्। कतिपय अनलाइन मिडियाले यस्ता गलत कुरा गरेर चस्का दिइरहन्छन्। अब पनि त्यसो गरे भने मुद्दा हाल्छु।' विवाह गर्ने उमेर भए पनि आफ्नो खुट्टामा उभिनसक्ने हुनुपर्छ, आफू सफल भएपछि वैवाहिक जीवन सजिलो हुन्छ भनेर आमाबुवाले सुझाउने गर्छन्।

विवाहका बारेमा पार्वती पनि त्यति सकारात्मक छैनन्।'मलाई विवाहपछि खासगरी केटीहरूको आत्मबल नै घटेर आउँछजस्तो लाग्छ। कतिपय साथी ओथारो बसेको पोथीजस्तो भएर घरमा बसेको देख्दा विवाह नै नगरौंजस्तो लाग्छ', उनी भन्छिन्। 

पाँच वर्षको अवधिमा नाचेरै काठमाडौंमा घर किनेँ। कतिपयले 'दानबहादुर' छन् कि क्या हो भन्छन्। मलाई रिस उठ्छ। दिनरात मेहनत गरेर काम गर्नेलाई पो थाहा हुन्छ, कसरी कमाइन्छ भनेर।

विवाहप्रति यही सोचका कारण कसैसँग प्रेम नगरेको उनको भनाइ छ। सामाजिक सञ्जाल वा अन्य कुनै माध्यमबाट कसैले आई लभ यु, आई मिस यु भन्यो भने उनलाई जिक्याएजस्तो लाग्छ। 'अहिले लभ गर्ने समय होइन। कसैले अफर गरे भने सकभर चित्त नदुख्ने गरी सम्झाउँछु, अति गरे भने सीधै ब्लक गरिदिन्छु', उनी प्रस्ट्याउँछिन्।

आफूलाई फिट एन्ड फाइन राख्न नियमित नृत्यले व्यायामको काम गरिरहेको बताउने उनी समयअनुुसार चल्न ग्ल्यामरस छवि आवश्यक भए पनि समाजले स्वीकार्नसक्ने हुनुपर्ने मान्यता राख्छिन्।

श्रोत - अन्नपूर्ण पोष्ट