सिनेमा हलमा राष्ट्रिय गान बज्ने

मंसिर १६, २०७२- 

चलचित्र विकास बोर्डले नेपाल भरीका सिनेमा हलहरुमा चलचित्र प्रदर्शन हुनुभन्दा अघि नेपालको राष्ट्रिय गान बजाउन निर्देशन दिएको छ । 

बुधवार बोर्डको कार्यालयमा आयोजित पत्रकार सम्मेलनमा बोर्डका अध्यक्ष राजकुमार राईले एकता र राष्ट्रियताको सन्देश प्रवाह गर्ने सन्दर्भमा नेपालभरका सबै सिनेमा हलहरूमा चलचित्र प्रदर्शन प्रारम्भ हुनुभन्दा अगावै राष्ट्रिय गान बजाउने चलचित्र निर्माण, प्रदर्शन तथा वितरण ऐन, २०२६ को दफा ९ को उपदफा ९२० मा भएको व्यवस्था बमोजिम बोर्डले टुके तथा एमपिइजी भर्सनमा राष्ट्रिय गानको श्रव्यदृश्य सामाग्री निर्माण गरी दुई साता भित्र नेपाल चलचित्र संघ तथा चलचित्र हलहरुमा उपलब्ध गराउने तथा कार्यन्वयनका लागि पत्राचार गर्ने बताए ।

पत्रकार सम्मेलनमै स्वदेशी चलचित्रको शेयर बाँडफाँडको सम्बन्धमा पनि बोर्डले नयाँ नीति ल्याएको जानकारी गराइयो । केही मल्टिफ्लेक्स सिनेमा हलहरुले शेयर बाँडफाँडमा विभेद देखाएको पाइएको र अब उप्रान्त हरेक मल्टिफ्लेक्स हलहरुबाट निर्माताले पहिलो साता ५० प्रतिशत, दोश्रो साता ४२ दशमलव ५ प्रतिशत, तेश्रो साता ३७ दशमलव ५ प्रतिशत र त्यस उप्रान्त ३० प्रतिशतका दरले शेयर बाँडफाँड गर्ने सहमती भएको अध्यक्ष राईले जानकारी दिए ।

अध्यक्ष राईले स्वदेशी चलचित्रको प्रचार प्रसारका लागि मल्टिफ्लेक्स चलचित्रघरहरुले सोही चलचित्रघरमा प्रदर्शन गरिने चलचित्रको प्रचार प्रसार गर्दा निर्माताहरुबाट अलग्गै शुल्क समेत लिने गरेको सन्दर्भमा नेपाल चलचित्र संघसंग भएको छलफलपछि विकास बोर्डसंग अब उप्रान्त कम्तीमा दुई हप्तासम्मको प्रचार प्रसार नि:शुल्क गर्ने सहमति भएको बताए ।

श्रोत - साप्ताहिक